Ցանկացած ոլորտում գործող բիզնեսի համար առաջնային նպատակ է համարվում տեղական շուկայում կայունանալը։ Այս նպատակը արդեն իրագործվել է Zakaryan-ի կողմից։ Մեր բրենդը շարունակում է տարածվել նաև արտաքին շուկայում, իսկ այժմ ունենք մի կարևոր նորություն, որով անչափ հպարտանում ենք։ 

Zakaryan-ը փետրվարի 24-27 Միլանում մասնակցելու է White Milano ցուցադրությանը: Ցուցադրությանը մասնակցելու ենք «UNION» հավաքածուով, որի դիզայները Նելլի Սերոբյանն է։

White Milano-ն կանացի հագուստի հավաքածուների գլխավոր ցուցահանդեսն է Եվրոպայում, որին մասնակցում են տարբեր երկրներից 550 բրենդ և մոտ 27000 այցելու։ Այն տեղի է ունենալու Իտալիայի Միլան քաղաքում՝ կանանց հագուստի նորաձևության շաբաթի շրջանակներում։ Ցուցահանդեսը լայն հնարավորություններ է ընձեռում մասնակիցներին՝ միջազգային շուկա դուրս գալու, մուլտիբրենդային խանութների հետ համագործակցության և ճանաչում ձեռք բերելու հարցում։

Ցուցահանդեսի մասնակիցների ընտրությունն իրականացվում է մանրակրկիտ կերպով՝ ընտրելով այն բրենդներին, որոնց արտադրանքը համապատասխանում է միջազգային շուկայի ստանդարտներին և պահանջներին։ Ինչպես նշեցինք՝ Zakaryan-ը ներկայանալու է «UNION» հավաքածուով, որը ստեղծվել է շատ մեծ ջանքերի գործադրմամբ։ 

Շնորհավորում ենք հավաքածուի դիզայներ Նելլի Սերոբյանին փայլուն աշխատանքի համար, որով կներկայացնենք Հայաստանը այդ կարևոր միջոցառմանը։ Մեծագույն պատիվ է մասնակցել նման մասշտաբային իրադարձության, իսկ մեր սիրելի հաճախորդների նվիրումն ու գնահատականներն անչափ պարտավորեցնող են։